Mũthenya wa Mwendandũ

Rũgano rwa Mwendandũ na Wainegene Magĩetha Njũng’wa: Gĩcunjĩ kĩa Mũgwanja

Ugai ĩ tha…

Nĩ ma gĩeterero ti kĩinaino. Mũthenya wa Kiumia ũrĩa wetereirwo mũno nĩ andũ othe a bũrũri nĩ wakĩire ũtarĩ na kanaĩ. Warĩ mũthenya mũnene, tondũ mũthenya ũyũ nĩ guo waharĩirio wa mũtongoria wa bũrũri kwamba gũcokeria mũingĩ njũng’wa nĩ guo ũikarĩri wa njũng’wa ĩyo mĩaka ĩngĩ ĩtano ũhootanĩrwo rĩngĩ.

Mũthenya ta ũyũ wokaga rita rĩmwe tu thutha wa mĩaka ĩtano, na kwoguo warĩ mũthenya wa bata mũno bũrũriinĩ.

Igongona rĩa mũtongoria wa bũrũri agĩcokeria mũingĩ njũng’wa rĩarĩ o igongona tu, tondũ ti njũng’wa yo nyene yacokagio nĩ igongona rĩa wĩnyihia rĩrĩa mũtongoria wa bũrũri eigananagia na mũingĩ wothe wa bũrũri na agetĩkĩria na mĩario ya kanua gake njũng’wa ĩhootanĩrwo rĩngĩ gwa kahinda ka mĩaka ĩtano.

Ũguo nĩ kuga, mũtongoria o wothe wa bũrũri aikaragĩra njũng’wa mĩaka ĩtano kĩrũmanĩrĩrio, no nĩ etĩkagĩrio arũĩre ũikarĩri wa njũng’wa gwa kahinda kangĩ kamwe tu ka mĩaka ĩtano, na ahootana agakorwo aikarĩire njũng’wa kahinda ka mĩaka ikũmi. Angĩahotirwo gĩthuranoinĩ kĩu, arĩkagĩria wĩra wake o hau na agacoka mũciĩ mũndũ ũngĩ ũrĩa wahootana agaikarĩra njũng’wa. Kwoguo ũhootanĩri wa njũng’wa wambagĩrĩria biũ mũthenya ũyũ thutha wa igongona.

Mũthenya ũyũ kaingĩ nĩ wetanagio na rĩtwa rĩa mũtongoria ũrĩa warĩ njũng’wainĩ kahinda kau. Na nĩ kĩo mũthenya ũyũ wetagwo Mũthenya wa Mwendandũ.

Ngware ya mbere ĩkĩgamba, nĩ guo mĩtongoro ya arũmĩrĩri a Mwendandũ, Wainegene, na Wamuciĩ yambĩrĩirie kũriginyũka yerekeire kĩharoinĩ kĩa wĩyathi, kũrĩa mũcamanio wa igongona rĩa Mwendandũ agĩcokeria mũingĩ njũng’wa wagomanagwo.

Mĩtongoro ya mbere yarĩ ya muno na yo yarũmĩrĩirwo nĩ ĩngĩ mĩingĩ ya mũingĩ wa bũrũri, kanini na kanene, atumia na athuuri hamwe na ciana, tondũ gũtirĩ wendaga gũtigwo na thutha. Arĩa anyinyi matigirwo ma thutha marĩ a kũrangĩra mĩciĩ mũthenya ũcio, kana arĩa marĩ arwaru, tũkenge, akũrũ, na angĩ anyinyi arĩa matangĩahotire gwĩkinyia kĩharoinĩ kĩa wĩyathi mũthenya ũcio wa igongona nĩ ũndũ wa bata mũna.

O na gũtuĩka mũthenya ta ũyũ kaingĩ ndwakoragwo na mĩario mĩingĩ tiga ya mũikarĩri wa njũng’wa wa kahinda kau na arĩa mang’eng’anagĩra njũng’wa ĩyo nake, ndeto cia Mwana wa Ngai gũkunyithio itina nĩ Wainegene, cia ihoboka na waũri wa nguo wa Wainegene ciarĩ o igũrũ, ta kũndũ Wainegene atonyete mĩarioinĩ ya mũingĩ na akahata mĩarioinĩ ĩyo na ndahatũke.

Kwaria ma, mũingĩ nĩ wendaga gũtigana na ndeto cia Wainegene, no managĩ make marũmanĩrĩire ũmwe kwa ũmwe hatarĩ gĩtithio, na o na mũthenya ũyũ wa Mwendandũ, Wainegene ningĩ arĩ na managĩ mangĩ merũ ma kũgĩa na mĩtwe ĩĩrĩ. Gwatuĩkaga atĩ Wainegene araire akĩĩhĩta atĩ nĩ akaguũria mĩtwe ĩyo yake yerĩ kĩharoinĩ kĩa wĩyathi mũthenya ũcio wa Mwendandũ, tondũ nĩ guo werĩgĩrĩirwo gũkorwo na andũ aingĩ mũno na kwoguo warĩ mweke mwega wa kũmenyithania magegania macio ma kũgĩa mĩtwe ĩĩrĩ.

No anga nĩ ndutirie ndeto haraya, reke twambe twarie cia mũthenya wa Mwendandũ.

Mĩtongoro mĩingĩ yakĩrũmanĩrĩire kũrũmanĩrĩra, yerekeire kĩharoinĩ kĩa wĩyathi. Mĩtongoro ya mbere yarĩ ya mumo wa mĩena yothe, mwena wa Mwendandũ mwene njũng’wa, na mĩena ya ang’ethanĩri ake, Wainegene, na Wamũciĩ. O na gũtuĩka mĩtongoro ĩyo nĩ yakuhanĩrĩirie, ndĩatukanaga yathiaga ĩtengete mwanya. Gatagatĩinĩ ka mĩtongoro ĩyo, nĩ kuo kwaiyũire ciana iria na cio ciarũmĩrĩire mĩtongoro ya aciari na andũ a matũũra. Ciana ciathiaga ĩgĩteng’eranagia, ikĩrũndanaga, na igĩthakaga mathako mangĩ ma ciana.

Rũcinĩ tene mũmo ruoro rũgĩtema, nĩ guo mĩtongoro mwanya mwanya yambĩrĩirie gũkinya kĩharoinĩ kĩa wĩyathi, na mĩtongoro ĩyo yaingĩra kĩharo yethugundaga itutu cia arũmĩrĩri a atongoria acindanĩri njũng’wa othe atatũ. Nĩ kwarĩ na tũtutu tũngĩ tũnini gũkĩra icio cia atongoria acio atatũ, na gwatuĩkaga tũtutu tũu twarĩ twa atongoria angĩ mũgwanja meingĩrĩtie ũhootanĩriinĩ wa njũng’wa thutha mũtheri. Kwoguo mwaka ũyũ kwarĩ ahootanĩri a njũng’wa ikũmi rĩiyũru.

O gĩtutu kĩarĩ na nguo cia marangi mwanya, kũringana na marangi marĩa mamenyithanagia arũĩri njũng’wa mwanya. Mwaka ũyũ itutu ĩgĩrĩ ciarĩ na nguo ĩhanaine no ũtiganu warĩ ngũbiainĩ, kĩmwe gĩekĩrĩte ngũbia cia sombrero, na kĩu kĩngĩ tũkũbia twa ing’eti nguhĩ. Marangi ma ikundi icio cierĩ marĩ ma macungwa, na kĩmwe kĩainaga rwĩmbo rwa tũnjimbo twa ndũrĩrĩ, na kĩrĩa kĩngĩ rwa tũnjimbo twa macumo.

Gĩkundi kĩa Mwendandũ na kĩo gĩekĩrĩte nguo cia marangi ma bururu na matune, na kĩainaga rwĩmbo rwa kazi iendelee, iendelee tena!

Mwethi njũng’wa wa mbere gwĩkinyia kĩharoinĩ kĩa wĩyathi mũthenya ũcio arĩ Wamũciĩ, na aingĩrire oimagarĩtio nĩ mumo warĩ mĩhari ĩĩrĩ nake arĩ gatagatĩ ka mĩhari ĩyo yerĩ, na akuhĩrĩria gĩtarainĩ gĩa kwarĩrio akĩruta ngũbia yake ya kĩng’eti gĩkuhĩ na akĩmĩoya na igũrũ agĩthiũrũrũkaga mĩena yothe, kũgeithia mũingĩ. Mũingĩ na guo ũkĩgeithĩka na njĩra ya kuoya guoko kũmwe igũrũ na gũkwereria mwena na mwena, amwe makĩhuhaga ihũni kana mĩrũri.

Mwethi njũng’wa wa kerĩ arĩ Wainegene, na aingĩrire ahiũhahiũhĩte ta kũndũ endaga kũhĩtũka Wamũciĩ nĩ guo akinye gĩtarainĩ gĩa kwarĩrio mbere yake, no ndahotire kũmũkinyĩra arĩ thutha makinya o manyinyi. Nake akĩruta ngũbia ya sombrero akĩmĩoya na igũrũ kũgeithia andũ akĩmĩinagia mwena na mwena. Mũingĩ ũkĩamũkĩra ngeithi ciake na njĩra o ĩyo ya kuoya guoko kũmwe igũrũ na gũkwereria.

Wamũciĩ na Wainegene makĩhaica ngathĩ cia gĩtara gĩa kwarĩrio, na magĩikario thĩ nĩ athuri marĩ hau gĩtarainĩ kĩu.

Nake Mwendandũ akĩingĩra kĩharoinĩ oimagarĩtio nĩ athuri a gĩtĩyo arĩa marutaga wĩra nao wa kũrangĩra njũng’wa na bũrũri. Thutha wao harĩ na imwana njĩthĩ, na cio ciarutithanagia wĩra na athuri acio nĩ guo imenye ũrĩa njũng’wa ĩrangĩragwo hamwe na bũrũri gũtikanakorwo na ithenya rĩa wagi ũmenyo wa wathani bũrũriinĩ o rĩ o rĩ. Ũcio nĩ guo warĩ mũtugo wa mwathanĩre wa bũrũri, kũharĩria njamba njĩthĩ hĩndĩ ciothe.

Mwendandũ we ndarĩ na ngũbia, no amwe a gĩkundi kĩrĩa kĩamumagarĩtie marĩ na ngũbia cia ing’eti nguhĩ cia marangi ma bururu na matune na rũri rwa matawa merĩ ma rangi mwerũ manyitanu na marĩ na nĩnĩmbĩ ndune.

Mwendandũ akuhĩrĩria gĩtara gĩa kwarĩrio akĩrũgama hanini, akĩoya guoko igũrũ kinya haha mũtweinĩ wake agĩcoka agĩgũceria maita maingĩ kuma hau mbere ya mũtwe wake gũthiĩ mwena wa ũrĩo akiugaga, iendelee, na guo mũingĩ ũgĩcokia, kazi iendelee tena!

Amwe makĩrũgama na igũrũ, angĩ makĩhũra hĩ, nao atumia na airĩtu makiuga ngemi ithano cia kahĩĩ. Mwendandũ akĩambata ngathĩ cia gĩtara gĩa kwarĩrio na agĩikario thĩ mwena wa ũrĩo wa gĩtara, nao ang’ethanĩri ake maikarĩte thĩ mwena wa ũmotho.

Mũtabania wa igongona akĩoya tũkero twĩrĩ ngubaco, akĩanĩrĩra wambĩrĩria wa igongona. Ũmũthĩ ti mũthenya wa mĩario mĩingĩ, mũtabania wa igongona akiuga, tũkwenda ang’ethanĩri na Mwendandũ meyarie mbere, matwĩre ũrĩa meharĩirie gwĩkĩra mũingĩ na kĩrĩa kĩratũma mende ũikarĩri wa njũng’wa kahinda gaka.

Thutha wa ũguo nĩ tũkũria Mwendandũ arekererie ũcindanĩri wa njũng’wa wambĩrĩrie, na atwĩre kĩrĩa kĩratũma ende gũthiĩ na mbere na ũikarĩri wa njũng’wa mĩaka ĩngĩ ĩtano.

Thutha wa mĩarĩo ĩyo, nĩ tũkũhinga igongona na ũcindanĩri wa njũng’wa wambĩrĩrie hau hau. O mũndũ ekũheo ndagĩka ithano eyarie, tondũ mĩario mĩingĩ ĩkwarĩrio mũingĩinĩ thutha wa igongona.

Wainegene akĩoya guoko na igũrũ, akĩũria mũtabania etĩkĩrio ambe eyarie arĩ we nĩ amu arĩ na ndeto hiũ endaga kwaria itanahora. Mũtabania akĩmwĩtĩkĩria kwambĩrĩra, na agĩikara thĩ nake Wainegene akĩoya tũkero akĩambĩrĩria mĩario.

Ndĩ na ũhoro mũhiũ ngwenda kũmwĩra nĩ amu karĩ ngoro kerirwo gatiĩyumbũraga. Ngwĩciria aingĩ anyu nĩ maiguĩte mĩhuhu ĩrathiũrũrũka bũrũriinĩ atĩ maũndũ makwa nĩ mambĩrĩirie kũhoboka nĩ ũndũ wa gũkunyithia Mwana wa Ngai itina, na maũndũ mangĩ ta macio. Ngwenda kũmwĩra ĩyo nĩ mĩhuhu, na hatirĩ maũndũ makwa mahobokete, o na gũtirĩ maũndũ makwa mangĩhoboka, Wainegene akiuga agĩcoka agĩtithia hanini, agĩkorora maita merĩ na agĩthiĩ na mbere na mĩario.

Tũrarĩ kĩharoinĩ gĩkĩ ira, na ndĩraũra nguo ndĩretiga ũtheri tiga no kanyitĩrĩri ndĩragirĩrĩirio gũkaũra nĩ mumo wakwa. Wendi wakwa nĩ muone ũrĩa ndĩramwĩhoka mũnengere njũng’wa ndĩyatage na yo ndĩ mũtheru ngoro biũ, nĩ kĩo ndĩraũrĩte nguo mũnyone kinya ngoro thĩiniĩ, Wainegene ningĩ agĩtithia hanini, na agĩcoka agĩthiĩ na mbere na mĩario.

Kũhana ta ũguo, nĩ ngwenda kũmũmenyithia ũndũ ũngĩ wakwa mwerũ, nĩ guo muone biũ niĩ ndithiragwo nĩ wara, mawara maingĩ manyumaga thutha kinya ndathiĩ toro ngareherwo mawara mangĩ merũ nĩ araika akwa.

Rĩu mũranyona ũguo nũngiĩ mbere yanyu, ndĩ wa mĩtwe ĩĩrĩ mĩnyitanu, na kwoguo ndaikarĩra njũng’wa nĩ ta andũ erĩ megũkorwo magĩikarĩra njũng’wa handũ ha gũte mweke ũcio wa andũ erĩ na gũikarithĩria njũng’wa mũndũ ũmwe, ta ũrĩa Mwendandũ amĩikarĩire arĩ wiki mĩaka ĩtano mĩthiru.

Harĩ mĩtwe ĩyo ĩĩrĩ, ũmwe nĩ ũrĩa wakwa ndũire na guo, na ũcio ũngĩ nĩ wa DM njĩrĩga gwĩtia Amerika na nĩ ũranginyĩire na ndĩraũigĩrĩra mũtweinĩ wakwa wa mbere na yerĩ ĩranyitana biũ, o na gũtuĩka mĩtwe ĩno nĩ ĩhana ta ĩnoretie mwĩrĩ ngahana ta ndĩ mũimbu hanini.

Wa kerĩ, Wainegene agĩthiĩ na mbere na mĩario, mũndũ ndangĩgĩkorwo na mĩtwe ĩĩrĩ mĩnyitanu na ndegarũre rĩtwa rĩake nĩ guo agĩe na rĩtwa rĩerũ rĩkuanĩtie mĩtwe ĩyo yerĩ.

Kuma ũmũthĩ, rĩtwa rĩakwa rĩerũ nĩ Pentagon DM Wainegene, kana PDMW, na njĩra nguhĩ.

Ndĩrenda mũhe njũng’wa njikarĩre nĩ guo ndĩyatage na yo, na o ta ũguo rĩtwa rĩu rĩakwa rĩerũ rĩronania, ndĩrutaga wĩra wa kũgayanĩra tũnjimbo ndĩ na mĩtwe ĩĩrĩ, nĩ guo ũmwe ũngĩngereria mĩiguainĩ ũyũ ũngĩ ũkanũnga nĩ guo ngayage tũnjimbo na njĩra njega hĩndĩ ciothe.

Na itanariganĩrwo, Wainegene akiuga, mũtwe ũmwe ndĩrarutire o kũrĩa njĩrĩga kũruta hama yakwa ndune, kĩonania kĩa makari marĩa thiri kari yakwa ĩrĩgũragĩra honge ciothe cia yo ndaikarĩra njũng’wa, handũ ha gũtũũra na matoyota maya ma mbeca inyanya, na nĩ guo magoti monganirio bũrũriinĩ ũyũ ũtukũ na mũthenya.

Mũtwe ũcio ndĩrarutire mũrĩmo nĩ guo ũhootithanĩtie ũikarĩriinĩ wa njũng’wa kũu mũrĩmo na mĩrĩmoinĩ ĩngĩ mĩingĩ, na nĩ guo ndĩreta na njĩra nguhĩ DM, ndemwa imwe cia rĩtwa rĩakwa rĩerũ.

Na rĩo rĩtwa Pentagon, rĩronania wathani ũrĩa ngũrehe bũrũriinĩ ũyũ mwanengera njũng’wa, wathani wa kũnyitanĩra na Pentagon ya mũrĩmo wa Amerika, nĩ guo bũrũri witũ ũthiĩ na mbere na ũgĩe indo nyingĩ cia mbaara ta bũrũri wa Amerika. Na kĩu nĩ kĩambĩrĩria ngwacĩ nyingĩ, ngĩrĩkia mĩaka ĩtano njũng’wainĩ, marĩtwa maingĩ ma matũũra bũrũriinĩ marĩtagwo Pentagon, manyũmba ta guo, mabarabara ta guo, kinya ciana irĩciaragwo igetwo Pentagon. Gĩthĩ bũrũri ndũgũgĩthiĩ na mbere mũno mwanengera njũng’wa? Wainegene akĩũria, agĩcoka agĩthiĩ na mbere na mĩario ta arĩ we mwene weyũragia kĩũria kĩu.

Mũtikanjonore andũ aitũ, Wainegene agĩthiĩ na mbere na mĩario ahũmahũmĩte, nengerai njũng’wa ndĩyatage na yo, na niĩ ndĩmurute thĩ ya gatatũ ndĩmũtware ũtongainĩ wa thĩ ya mbere, Pentagon ya mbere, ĩrĩa ĩgũkorwo na tũnjimbo tũhana twa Pentagon ya mũrĩmo wa Amerika.

Hĩndĩ ĩyo nĩ guo mũtabania arũgamire na igũrũ na akĩmenyithia Wainegene ihinda rĩake rĩarĩ ithiru.

Wainegene akĩambĩrĩria gũkinyũkia erekeire gĩtĩinĩ gĩake o akĩaragia ciugo ciake cia mũthia, no atanakinya gĩtĩinĩ, mũtumia ũrĩa wa gĩtambaya gĩkundĩkanie gĩkoneka ta arĩ gathukĩ aigĩrĩire mũtwe akĩhiũkĩra hau mbere ya gĩtara gĩa kwarĩrio akĩinaga rwĩmbo rwake:

Ndĩ na ihu rĩakwa
Ndarutire Kĩndawa
Na Ngwenda riume
Ndikerwo nĩ rĩa ngati

Mũtumia ũcio ainaga akĩgucagia itonyo rĩake haha hakuhĩ na maru rĩkagucũka rĩgacoka rĩkamũhĩmbĩria rĩngĩ ta rĩrĩ rĩarĩ na mũgucũki, na eka ũguo maita merĩ akoina iru agacoka agathiĩ na mbere na kũina na kũgucia itonyo o rĩngĩ agĩthiaga kinya akĩbuĩria o akĩinaga.

Wainegene agĩkinya gĩtĩinĩ gĩake o akĩaragia cia tũnjimbo, tũhama, Pentagon, na rĩtwa rĩake rĩerũ, PDMW, na agĩikara thĩ. Nake mũtabania akĩũria Wamũciĩ arũgame na igũrũ eyarie.

Wamũciĩ akĩrũgama, akĩgeithia andũ rĩngĩ na kũinia ngũbia o ta ũrĩa ekĩte akĩingĩra kĩharo, na akĩnyita tũkeero twĩrĩ ngumbaco na guoko kwa ũmotho, akĩambĩrĩria mĩario.

Nĩi ndĩ Wamũciĩ ndikwaria mũno, no nguga o ta ũrĩa njugaga kaingĩ atĩ, mũthenya wakinya ngagerera gatagatĩ ka Mwendandũ na Wainegene magĩcoka kũrora makore ũikarĩri wa njũng’wa ndahootanire tene.

Ũndũ wa kerĩ, Wamũciĩ akiuga, tũnjimbo tũu mũrerĩrwo twa ndũrĩrĩ ti twega. Tũnjimbo tũrĩa twega, na nĩ tuo nĩi Wamũciĩ ngũmũrehera, nĩ tũnjimbo twa macumo. O macumo kĩgĩna kĩna na kanjimbo ka mo, o ũguo o ũguo kinya macumo ma tũnjimbo tuothe maiganane kererere.

Wa Gatatũ, Wamũciĩ agĩthiĩ na mbere na mĩario, nĩ atĩ niĩ ndutaga wĩra wa gwĩka ciama, ndoiga kĩama gĩkĩke andũ maiyũre kĩharo kĩna, kĩama kĩu gĩgekĩka na gĩkonwo nĩ mũingĩ wothe. Hau ndĩrenda mũmenye atĩ o na njũng’wa mũkũnengere na kĩama, arĩa mataretĩkania na ũhoro ũcio nĩ maikare makũrĩire ithenya rĩĩrĩ maitho matikahĩtũkwo nĩ kĩama.

Wa kana, na nĩ guo wa mũthia ngwaria ũmũthĩ, nĩ atĩ mũtigetĩkanie na mĩhuhu ĩyo ĩrathiũrũrũkio nĩ thũ ciakwa atĩ nĩ ngwĩruta ũcindanĩriinĩ wa ũikarĩri wa njũng’wa nyingĩre gĩkundiinĩ kĩa Mwendandũ kana kĩa Wainegene. Njamba nĩ kuonana nganja igathira, na gĩthũri gĩakwa kĩ mbere tuonane na njamba ici kinya ũhootani wakwa woneke na kĩama kĩu ndamũgwetera hau rũgongo.

Wamũciĩ akĩrĩkia mĩario yake, na agĩikara thĩ gĩtĩinĩ gĩake.

Mũtabania wa igongona akĩũria Mwendandũ arũgame na etĩkĩre na miario ya kanua gake njũng’wa ĩcindanĩrwo kuma ũmũthĩ, acoke eyarie.

Mwendandũ akĩrũgama na igũrũ, akĩgeithia mũingĩ na guoko kwa ũrĩo na njĩra ya gũgũceria kuma mbere ya mũtwe wake kwerekera mwena wa ũrĩo o ta ũrĩa ageithanĩtie akĩingĩra kĩharo akiugaga iendelee! Na guo mũingĩ ũkĩamũkĩria ngeithi ciake, kazi iendelee tena!

Mwendandũ ndarĩire marĩgu, oire guoko o kũu kwa ũrĩo na igũrũ agũkũnjũrĩte ciara ikarora igũrũ akiuga, wĩra wa ũcindanĩri wa njũng’wa uendelee!

Ngemi igĩatũra rĩera kuma mĩena yothe ĩna ya kĩharo, mbugĩrĩrio ya gĩkeno na yo ĩkĩgĩa igũrũ, na cio hĩ ikĩrĩra ta ngwa kĩharoinĩ gĩothe ta gwa kahinda ka ndagĩka igĩrĩ kana ithatũ ũguo. Mũingĩ ũgĩcoka ũgĩikara thĩ weterere mĩario ya Mwendandũ.

Mwendandũ ambĩrĩirie mĩario yake na kuga arĩ na gĩkeno mũthenya ũcio nĩ ũndũ wa kũhingia wĩra wake ũrĩa ahetwo nĩ mũingĩ mĩaka ĩtano mĩhĩtũku, na kũria mũingĩ ũmuongerere mĩaka ĩngĩ ĩtano arĩkie mawĩra ma kũhonia mĩrimũ ya Gwakwo na Kũhũyũka, ĩrĩa ambĩrĩirie kũhonia o na gũtuĩka ndĩarĩkĩte kũhona kaimana.

Niĩ ndingĩrũgama haha mbere yanyu ndĩmũhenie atĩ mĩrimũ ĩno nĩ mĩhonu ĩtarĩ mĩhonu, aca. Niĩ ngwaria ma njonore maheni. No nĩ ngwenda mũririkane atĩ tũkĩruta wĩra ũcio twambĩrĩirie wa kũhonia mĩrimũ ĩyo yerĩ, amwe me haha matũire morũraga handũ ha kũruta wĩra, na rĩu marenda mũmanengere njũng’wa, Mwendandũ akiuga, agĩcoka agĩtithia hanini ta kũndũ endaga ũhoro ũcio ũingĩre mĩrĩinĩ ya andũ, agĩcoka agĩthiĩ na mbere na mĩario.

Ndikwaria mũno ũmũthĩ, tondũ mĩario mĩingĩ ngwarĩria andũ tũtutuinĩ twao, mĩciĩnĩ yao, na iharoinĩ cia matũũrainĩ ma mũingĩ bũrũrinĩ wothe kwambĩrĩria ũmũthĩ kinya mũthenya wa gĩthurano kĩa ũikarĩri wa njũng’wa.

Ngwenda mũmenye mucera na mũkũndũ akũndũkaga o take, na mũikari mũtĩ gĩtina nĩ we ũĩ kĩrĩa thambo ĩrĩyaga. Niĩ ngwenda o mũnjĩtĩkĩrie ndĩkie wĩra wa kũhonia mĩrimũ ĩyo yerĩ, wa Gwakwo, na wa Kũhũyũka, na yetunya nduma na niĩ ndĩtunye nduma ũikarĩriinĩ wa njũng’wa.

Kwĩrĩrwo kwerirwo ti kuo kũnengerwo, na ngwenda mwĩthurĩre mũruti wĩra handũ ha mwĩranĩri mana na kũrĩa mana macio mariumaga mũtiũĩ.

Mwendandũ akĩrĩkia mĩario yake, na agĩikara thĩ o akiugaga, iendelee, na guo mũingĩ ũgacokia, iendelee tena!

Mũgambo wa mũtumia ũmwe tu no guo waiguĩkire ũkiuga:

No Mwendandũ waria cia mĩrimũ. Na ma hatirĩ ũngĩ wagweta mĩrimũ na nĩ guo twetereire mũmĩhonia.

Kĩharo rĩu gĩgĩkira ngiria gwa kahinda ta ka ndagĩka ithatũ.

Mũtabania nĩ guo arũgamire na igũrũ na akĩmenyithia atongoria acio ang’ethanĩri wethiinĩ wa ũikarĩri wa njũng’wa maingĩrane na mũingĩ kĩharoinĩ meyarĩrĩrie.

Wethi wa njũng’wa ũkĩhana ta wekĩrwo ngia nene, Mwendandũ, Wainegene, na Wamũciĩ magĩikũrũka ngathĩ kuma gĩtarainĩ gĩa kwarĩrio merekeire kũrĩ mũingĩ kwĩyarĩrĩria maheo ũikarĩri wa njũng’wa, o mũndũ na wara wake wa gwetha mĩtĩ ya ũikarĩri wa njũng’wa.

Mũhootani wa njũng’wa akamenyeka thutha wa mweri ũmwe, no maũndũ marĩa megwĩkĩka gũgĩgakinya hĩndĩ ĩyo, managĩ marĩa mekuoneka gũgĩgakinya hĩndĩ ĩyo, gĩcambanio na mĩhuhu ĩrĩa ĩgũtuthũka gũgĩgakinya hĩndĩ ĩyo, nĩ mĩingĩ ma.

Cokai haha Kiumia kĩngĩ mũtegete matũ ndĩmũganĩre cia Mwendandũ na Wainegene magĩetha njũng’wa!

O rĩngĩ RIRIKANA, mũtĩ ũgĩaga bata nĩ gũikio irebeinĩ hĩndĩ ya gĩthurano. We wĩ na guo, menyerera ndũkanacererwo mũthenya wa gĩthurano wakinya. Gurumũka na mũtĩ waku na ũgurumũre angĩ ikũmi. Mũndũ ũmwe ndeheragĩrwo njĩra. Karumbeta nĩ kahuhe, na guo coro ũrĩ thutha!

Thaaai!

Hihinya ndari ũthome rũgano rwa Mwendandũ na Wainegene Magĩetha Njũng’wa, gĩcunjĩ kĩa: 1 , 2, 3, 4, 5, 6