Nĩ Ũĩ no Ũtambie Ũhoro Kamemeinĩ wĩ Mũciĩ Gwaku?

Ũmũthĩ nĩ ndambirie TN yakwa ya marebeta, Maitũ nĩ Ma Itũ Kerĩ, kamemeinĩ itũũra rĩrĩa njikaraga rĩtagwo Laramie, Wyoming, na wakinyĩra andũ moima mita 100 ũguo kuma nyũmba yakwa. Ndambirie TN ĩno yakwa kahinda ka mathaa merĩ. Arĩa mathikĩrĩirie me kwao mĩciĩ moigire mekũiguaga ta me bũrũriinĩ wa Kenya magĩthikĩrĩria tũmeme twa Gĩgĩkũyũ.

O nawe no ũhote gũtambia ũhoro waku o wothe tũmemeinĩ twa kwanyu.

Ũtambia ũyũ no wĩkwo na kombiuta kana na podcast. O na ũngĩkorwo na kĩhũngĩro no wĩkĩrage podcast ciaku kĩhũngĩroinĩ kĩu na andũ mathikĩrĩrie rũrendainĩ o kũrĩa mangĩkorwo marĩ.

Gĩtambia (transmitter) kĩa ũhoro tũmemeinĩ kĩrĩa ngũtambagia na kĩo gĩtagwo Broadcast Your Podcast (BYP), na gĩtirĩ hinya gũthondekwo nĩ mũndũ o wothe o kũrĩa angĩkorwo arĩ.

Mũndũ angĩona mũtaratara wa gũthondeka gĩtambia gĩkĩ kĩa ũhoro tũmemeinĩ, no ethondekere na moko e mũciĩ gwake, kana atware indo cia gũgĩthondeka kũrĩ bundi wa thaa kana wa tũmeme wa itũũra rĩake amũthondekere thutha wa ndagĩka ta ikũmi ũguo. Hihinya haha wone ũrĩa gĩtambia gĩkĩ kĩa BYP gĩthondekagwo.

Mwambĩrĩria wa ũtambia ũyũ wa raithi hamwe na mwaki wa gĩtambia kĩa BYP nĩ Lotte Meijer, wa Amsterdam, Netherlands.

Ũngĩenda gũtũmĩrwo gĩtambia kĩa BYP kĩa burĩ no wandĩkĩre Lotte Meijer marũa ma kũbucia kũgerera: lotte@broadcastyourpodcast.com

Hihinya haha wone arĩa matambagia ũhoro na BYP na kũrĩa maikaraga.

Ngwĩhoka nĩ ũkwambĩrĩria gũtambia ũhoro waku we mwene itũũrainĩ rĩaku. Ndiũĩ kũrĩa gũtarĩ gwĩtĩkĩrie ũtambia ta ũyũ bũrũriinĩ wa Kenya, no ũrie mũrũgamĩrĩri wa itũũra kana ũrore watho wa ũmemerekia wa mohoro tũmemeinĩ wa gĩcigo kĩrĩa ũikaraga.

Ũngĩkorwo na ciũria o ciothe no ũnyandĩkĩre marũa ma kũbucia kũgerera: waciku@hotmail.com

Thaaai!

Kũngũ Mwaka Mwerũ!

Nĩ ndamũgeithia mũno na Mwaka Mwerũ wa 2007. Nĩ ndamũcũnga mũhera inyuothe tondũ ndiĩrĩga kwandĩka kĩhũngĩroinĩ gĩkĩ gwa kahinda karaya. O na gũtuĩka ndirendaga kũmũtinĩria uthi, nĩ njikarĩte kahinda karaya itandĩkĩte nĩ ũndũ wa itũmi nyingĩ, imwe iria irũmĩrĩire haha mũhuro:

Wa mbere, nĩ ngoretwo na wĩra mũingĩ na kwoguo ngaga kahinda ga kwandĩka o na ngĩendaga.

Wa kerĩ, nĩ ngoretwo na matarania ma ngoro ma ũrĩa ingĩhota kũhũthĩra kĩhũngĩro gĩkĩ na njĩra ĩrĩa njega mũno ya gũkũria rũthiomi, athomi, hamwe na gwĩkũria niĩ mwene.

Wa gatatũ, nĩ ndĩrendaga kwamba gwiciria njĩra ĩrĩa njega mũno ya wandĩki wa rũrendainĩ wĩ na umithio kũrĩ mũingĩ. Hatirĩ bata kũinaga o rũrĩa rwakũywo, na kwoguo ngĩona arĩ wega gwethera kĩhũngĩro gĩkĩ goico ga kĩo karĩa kĩngĩhota kwandĩkagĩra maũndũ me na umithio kũrĩ mũingĩ.

Ngwĩhoka goico kau nĩ karonekire kahinda kau njikarĩte itandĩkĩte, na kwoguo mandĩko ma kĩhũngĩro gĩkĩ nĩ mekwagĩra makĩria mwakainĩ wa 2007. Mũgĩ nĩ mũtaare!

Tũkĩrũgia Mwaka ũyũ Mwerũ wa 2007, ndĩ na mwĩhoko atĩ rĩu nĩ ndĩrĩandĩkaga kaingĩ, na makĩria mũno ngwĩhoka nĩ ndĩrĩandĩkaga maũndũ ma ũkũria wa bũrũri witũ wa Kenya na wa Abirika yothe handũ yarũma, ũkũria wa rũthiomi rwa Gĩgĩkũyũ na wa thiomi ciothe cia Abirika, na ũkũria wa meciria makwa hamwe na ma athomi a kĩhũngĩro gĩkĩ.

Gĩeterero ti kĩinaino!

O rĩngĩ, nĩ ngũmwendera Mwaka Mwerũ wa gĩkeno, magetha, irathimo, na kĩguni.

Thaaai!