Thursday, January 12, 2006

Kũhingũra Mwaka Mwerũ wa 2006

Kũngũ Mwaka Mwerũ! Kũngũ thiomi ciothe cia Abirika! Kũngũ wĩkũria wa gũtũũra! Kũngũ maitũ na hunyũ wake! Kũngũ rũthiomi rwitũ rwa Gĩgĩkũyũ! Kũngũ Maitũ nĩ Ma Itũ!

Icio nĩ ngeithi ciakwa cia Mwaka Mwerũ ngĩkũngũĩra mwaka ũyũ wa 2006, ũkũria wa thiomi cia Abirika, wĩkũria wa gũtũũra, na ũkũria wa kĩhũngĩro gĩkĩ gitũ: Maitũ nĩ Ma Itũ, kĩrĩa tũgũthiĩ na mbere gũkũrĩria rũthiomi rwitũ rwa Gĩgĩkũyũ o tũkĩmũrĩkagĩra thiomi ciothe cia Abirika gacĩra ga gwĩkũrĩria haha Magomano ma nenda cia kombiuta!

Tũkwĩhoka inyuothe nĩ mwĩharĩirie tũkũrie rũthiomi rwitũ mwaka ũyũ na twĩkũrie. Mweri 1 wa Kĩhu gĩa Kerĩ 2005, nĩ guo twahingũrire kĩhũngĩro gĩkĩ kĩa Maitũ nĩ Ma Itũ. Nĩ twandĩkĩĩte mandĩko 18 mwaka ũgĩthira, o na gũtuĩka twambĩrĩirie mwaka wĩ hakuhĩ gũthira. Tũkwĩhoka mwaka ũyũ nĩ tũgũthiĩ na mbere kwandĩka na kĩyo o ta mwaka ũcio ũrathirire. Ĩndĩ bata mũnene ti gũtara mandĩko marĩa tũkwandĩka ta ũgima, ũgĩ, na ũrutani wa mandĩko maitũ.

O ta ũrĩa twandĩkire mandĩkoinĩ maitũ ma mbere kĩhũngĩroinĩ gĩkĩ, muoroto witũ nĩ gũkũria rũthiomi rwitũ rwa Gĩgĩkũyũ, kũhe andĩki a Gĩgĩkũyũ mweke wa kwandĩkaga mawoni mao rũrendainĩ, na kũmũrĩkĩra thiomi ciothe cia Abirika gacĩra ga gwĩkũrirĩa Rũrendainĩ rwa Thĩ Yothe.

Mwaka ũyũ twĩ na mwĩhoko wa gũtereta kĩhũngĩroinĩ gĩkĩ na andũ maigana ũna arĩa tũkuona mangĩtũtaara wĩkũriainĩ witũ wa rũthiomi na wa kwĩyohora mĩnyororoinĩ ya ũtũũrwa. Nĩ tũrĩmũmenyithia twabanga ndereti icio.

Mandĩkoinĩ maitũ ma mbere nĩ twandĩkĩte ũhoro wa kiugo “blog” na ũrĩa kĩngĩtwo na rũthiomi rwitũ. Nĩ ngwenda mũmenye o na andĩki a Gĩthwaĩri nĩ hĩndĩ mararĩrĩria rĩtwa rĩu blog ũrĩa rĩngĩtwo na rũthiomi rwa Gĩthwaĩri. Hihinya haha ũthome mĩario ĩyo.

Ningĩ nĩ ngwenda kũmũririkania o rĩngĩ ũhoro wa Ndaũri Ndaarĩria ya Gĩgĩkũyũ Rũrendainĩ rwa Wikipedia na o rĩngĩ nĩ ngũria andũ ana merutĩre (na niĩ wa gatano na nĩ ndĩrutĩire) twambĩrĩrie Wikipedia ya rũthiomi rwitũ rwa Gĩgĩkũyũ. Ũngĩkorwo nĩ ũrenda kwĩrutĩra no ũnyandĩkĩre marũa-ma-kũbucia ũũmenyithie.

Kũngũ Mwaka Mwerũ wa 2006!

Thaaai!

0 Comments:

Post a Comment

<< Home