Sunday, November 20, 2005

Ũmũthĩ nĩ Mũthenya wa Gũikia Mĩtĩ ya Icokia rĩa Mũingĩ Kenya


Mũtongoria wa bũrũri witũ, Mũgathe Mwai Kĩbakĩ, ũmũthĩ nĩ arĩirie mũingĩ wothe wa Kenya kũgerera terebiconi na tũmeme. Nĩ aririkanirie mũingĩ wa Kenya handũ warũma atĩ rũciũ mweri 21 wa Kanyua Hũngũ 2005, nĩ mũthenya wa bata mũno hithitũrĩinĩ ya bũrũri witũ, nĩ ũndũ nĩ guo mũthenya mwamũre wa gũikia mĩtĩ ya Gwĩtĩkĩra kana Kũregana na Kĩambi Watho Kĩerũ.

Nĩ acokire oiga atĩ mũng’eng’ano wa kwĩyandĩkĩra Kĩambĩ Watho kĩerũ nĩ ũraikarire kahinda kanene gũkĩra matanya ma mũingĩ. No o na kũhana ũguo, mũng’eng’ano ũcio nĩ ũtũmĩte mũingĩ wa Kenya wĩmenyere maũndũ maingĩ ma bata marĩa maũkoniĩ, na ũmũthĩ ũyũ, bũrũri witũ wĩ na Kĩambi Watho gĩa kwĩyandĩkĩra.

No wĩthomere mĩario yake ũngĩhihinya haha, kana ũthikĩrĩrie gĩcunjĩ kĩa mĩario ĩyo wahihinya haha.

Ririkana gũikia mũtĩ waku nĩ guo tũteithanie gwĩthondekera njĩra njega ya kwĩruta mĩnyororoinĩ ya ũthũkũmũ na ũkombo, nĩ guo twĩkũrie na tũingate ũtũũrwa bũrũriinĩ witũ.

Ũhoro ũrĩa watũkinyĩra ta thaa igĩrĩ cia rũcinĩ thaa cia Kenya mweri 21 wa Kanyua Hũngũ, ũratuonia atĩ andũ aitũ nĩ meyumĩrĩtie kwa ũingĩ gũikia mĩtĩ yao ya Icokia rĩa Mũingĩ. Ndũkanoige ndwerirwo. Ũmũthĩ nĩ guo mũingĩ wa Kenya ũkwĩyohora mĩnyororoinĩ ya ũthũkũmũ na ũkombo wetĩkĩra Kĩambi Watho Kĩerũ.

Teng’ateng’era, hiũhahiũha, cũacũa, na ndũkanogere njĩra. Ikia mũtĩ waku ũmũthĩ wandĩke hithitũrĩ ya bũrũri witũ na thigino yaku we mwene!

Thaaaai!

1 Comments:

Blogger irena said...

Thengiu ni kwandika na gikuyu na gutuma ithui turi kuraya turirikane ruga itu:-0

November 22, 2005 2:49 PM  

Post a Comment

<< Home