Saturday, October 08, 2005

Wikipedia ya Gĩthwaĩri Rũrendainĩ

Mũrata wakwa, Ndesanjo Macha, mwene mburogo ya rũthiomi rwa Gĩthwaĩri, nĩ erĩga kũmenyithia atĩ kwĩ na Ndaũri ya rũthiomi rwa Gĩthwaĩri ĩtagwo Wikipedia ya Kiswahili ĩrandĩkĩrwo rũrendainĩ nĩ mũndũ wothe ũkwĩyendera. Ũhoro ũcio nĩ wangenirie na ngĩmũria kana no gũkorwo na Wikipedia ya rũthiomi rwa Gĩgĩkũyũ.

Ndesanjo nĩ andĩkĩire mũtongoria ũmwe wa Wikipedia na mũtongoria ũcio agĩcoka akĩnyandĩkĩra marũa ma kũbucia kũũmenyithia atĩ Wikipedia ya rũthiomi o ruothe no yambĩrĩrio kũngĩoneka andũ atano moĩ kwaria na kwandĩka rũthiomi rũu. Maũndũ mangĩ marĩa mendekaga nĩ maya:

1. Gwaka ithangũ rĩa mũciĩ na rũthiomi rũu
2. Gũtaũra cionereria cia Wikipedia
3. Gũtaũra mathangũ merĩ kana matatũ ma mĩbango na tabarĩra ya gũteithĩrĩria andĩki
4. Kwandĩka maratathi manini mega na rũthiomi rũu

Amwe a arĩa merutĩire kwndĩka Wikipedia ĩyo ya Gĩthwaĩri nĩ Ndesanjo Macha, na Mshairi , ũrĩa wĩrĩga kũnyamũkĩra, kũgathĩrĩria mburogo yakwa, na kũnjũria nyingĩre kĩama kĩa andĩki a mburogo a Kenya.

WIKIPEDIA YA GĨGĨKŨYŨ RŨRENDAINĨ
Niĩ nguona arĩ wega twĩrutanĩrie twambĩrĩrie Wikipedia ya rũthiomi rwitũ rwa Gĩgĩkũyũ rũrendainĩ nĩ guo rũkũranĩre na thiomi iria ingĩ. Kwerirwo thabarĩ ya mairũ ngiri imwe yambagĩrĩria na ikinya rĩmwe!

Ũngĩkorwo no wende kwĩrutĩra twake Wikipedia ĩno no ũũmenyithie.

Thaaai!

4 Comments:

Anonymous Makeri said...

Ugeithike muno. Njohera spelling ciakwa cia Gikuyu ti njega; Blogu ino ni njega muno na igututhomithia kiandiko kia Gikuyu. Ndireruta thimo (proverbs) cia Gikuyu, na nonyende dictionary kana thesaurus (wena links?) nigetha hote kupolish Gikuyu kiakwa written. Ni thengio muno ni blog ino!

October 11, 2005 8:02 AM  
Blogger Gatua wa Mbũgwa said...

Kũrĩ Makeri,

Nĩ wega mũno nĩ kwandĩka. Hihinya Thimo, na Ndaũri wone kana nĩ ũgũteithĩka.

Thaaai!

October 18, 2005 8:59 AM  
Anonymous Anonymous said...

Wimwega mundu ugwitwo Gatua wa Mbugwa. O nanii ndiri na uuru ona hanini. Nindaigua ndakenio muno ni mburugu ino ya gikuyu. Ti itheru ni igututeithia kumenya wega uhoro wigii ruthiomi rwitu rwa Ugikuyu.
Ndina Kiuria na no nyende unjokerie. Ingimenya atia uhoro wigii magongona maria marutagwo tene ta mburi ya ruracio, mburi ya uui ihua na icio ingi ciothe. Niwega.

December 15, 2006 12:17 AM  
Blogger Kimani wa Kimwaki said...

Mbugwa, ritwa riaku na Gikuyu kiega ni Mbugua (ta kuigua, no ti ta kugwa)

Ni nii, Kimani wa Kimwaki (no ti wa Kimuaki)

July 30, 2009 8:32 AM  

Post a Comment

<< Home