Maitũ nĩ Ma Itũ (Our Mother is Our Truth)

Amũkĩra ngeithi ciakwa o kũrĩa guothe ũngĩkorwo ũrĩ. Ndĩ na gĩkeno ngĩanĩrĩra atĩ nĩ ndambĩrĩria mburogo (blog) ya rũthiomi rwa Gĩgĩkũyũ ũmũthĩ ndĩ na muoroto wa gũkũria rũthiomi rwitũ rwa Gĩgĩkũyũ, kũhe andĩki a Gĩgĩkũyũ mweke wa kwandĩkaga mawoni mao rũrendainĩ, na kũmũrĩkĩra thiomi ciothe cia Abirika gacĩra ga gwĩkũrirĩa Rũrendainĩ rwa Thĩ Yothe (World Wide Web).

BLOG (MBUROGO KANA KĨHŨNGĨRO)
Nguona arĩ wega nyambe ndarĩrie kiugo gĩkĩ “blog”. Kiugo “blog” na rũthiomi rwa Gĩthũngũ nĩ kuga: “A blog is a web site, where you write stuff on an ongoing basis.

Ũguo nĩ kuga “blog” nĩ mandĩko ma ũtũũro wa mũndũ mandĩkagwo kaingĩ kaingĩ hamwe na wĩranĩri wake wa rũga kana njũga (link or links) cia Rũrenda Rwa Thĩ Yothe (RRTY) iria ekuona ciagĩrĩire kuonwo nĩ athomi a mburogo (blog) yake.

Kwa ũguo no tũtaũre kiugo blog na mwandĩki wa yo na rũthiomi rwa Gĩgĩkũyũ ta ũũ:

Blog - Mburogo kana Kĩhũngĩro
Blogger - Mũburogi kana Mũhũngi Mwĩranĩri

Mũhũngi Mwĩranĩri nĩ mwandĩki ũrĩa ũhũngaga ũhoro kũndũ na kũndũ na akeerĩra athomi ake harĩa arutĩte ũhoro ũcio nĩ guo nao mangĩenda kũũthoma no maũthome.

Kwa mũhiano, ũngĩenda kuona ciugo njerũ cia Gĩgĩkũyũ ta icio ngwete haha rũgongo no ũingĩre kĩeya kĩa Maitũ nĩ Ma Itũ rũrendainĩ ũngĩhihinya kiugo
gĩkĩ na ũngĩenda gũthoma mburogo ya rũthiomi rwa Gĩthwaĩri no ũhihinye haha.

KŨHŨNGA NA KWĨRANĨRA
Ngwĩhoka nĩ ndatarĩria wega kĩhumo gĩa kiugo “blog” na ũrĩa tũngĩgĩta na rũthiomi rwitũ rwa Gĩgĩkũyũ. We mũthomi wa kĩhũngĩro kana mburogo ĩno no ũtũtũmĩre mawoni maku.

Bata mũnene wa mburogo ĩno nĩ gũkũria rũthiomi rwa Gĩgĩkũyũ na kũrũhotithia gũkũranĩra na mawara, thayathi, ũturi, na maũndũ mothe ma thĩ yothe marĩa marakũra.

MAITŨ NĨ MA ITŨ
Mwandĩki wa Gĩthwaĩri wĩ ngumo nene, Shaban Robert, nĩ oigire: “Titi la mama litamu, hata lingawa la mbwa”.

Na nĩi nguga atĩ angĩkorwo nĩ tũkwenda gwĩkũria na tũkũrie bũrũri witu hamwe na mabũrũri mothe ma Abirika handũ yarũma, no mũhaka twambe twĩmenye ithuĩ ene, tũmenye harĩa tũrĩ na ũrĩa twakinyire ho, na tũmenye kũrĩa twerekeire na njĩra ya gwĩkinyia kũu tũrenda gũkinya. Tũngĩka ũguo, no tũgĩe na wĩkũria wa gũtũũra ũtarĩ wa ũtũũrwa.

Mbũri yaciara yongithagia ka yo, na ng’ondu o ta guo. Niĩ ndirĩ ndona mbũri ĩkĩongithia kagondũ kana ng’ondu ĩkĩongithia kori ka mbũri, o na gũtuĩka nĩ ikoragwo rũru rũmwe.

Ningĩ iria rĩa mbũri rĩkoragwo rĩ na ũgirĩrĩria wa mĩrimũ ĩrĩa inyitaga mbũri, rĩa ng’ombe na rĩo rĩkoragwo na ũgirĩrĩria wa mĩrimũ ya ng’ombe, na rĩa nyamũ ingĩ rĩkoragwo na ũgirĩrĩria wa mĩrimũ ya nyamũ icio ingĩ mwanya.

Na rĩo iria rĩa mbũri ya mwena wa rũgũrũ rĩkoragwo na ũgirĩrĩria wa mĩrimũ ya mbũri ĩrĩa yonekaga mwena wa rũgũrũ, na rĩa mbũri ya mwena wa itherero rĩkoragwo na ũgirĩrĩria wa mĩrimũ ĩrĩa yonekaga mwena ũcio wa itherero.

Gũteanĩria thiomi citũ twaragie ciene nĩ ũndũ ũmwe na kori ka mbũri gagĩtiganĩria iria rĩa nyina gagathiĩ kuonga hiti.

O na kũhana ũguo, ti kuga atĩ mbũri kana nyamũ icio ingĩ ciothe ndagweta itirĩ kĩndũ kĩngĩ inyuaga tiga no iria rĩa nyina. Kwa mũhiano, nĩ inyuaga maĩ, na andũ nĩ manyuaga iria rĩa ng'ombe kana rĩa mbũri. No iria rĩrĩa rĩgiragĩrĩria nyamũ mĩrimũ ya cio nĩ rĩa nyina wa nyamũ icio, na rĩrĩa rĩgiragĩrĩria andũ mĩrimũ yao nĩ rĩa nyina wao.

Kwa ũguo ni wega twambe twĩmenye, twĩrangĩre mĩrimũ na thũ, na thutha wa ũguo tũmenye andũ angĩ na mĩikarĩre yao, mabũrũri mao, thiomi ciao, na maũndũ mangĩ ta macio. Nĩ wega twambe tũmenye rũthiomi rwitũ wega na tũrũkũrie nĩ guo rũgunage njiarwa ta iria rĩu ndagweta hau rũgongo.

Gũtirĩ mũndũ ũngĩmenya kũrĩa arathiĩ atamenyete harĩa arũngiĩ rĩu! Rũthiomi rwa mũndũ nĩ ruo njĩra njega mũno na nũngarũ ya kwĩmenya.

Wĩkũrie na ũkũrie rũthiomi rwaku ũkĩmenyaga wega atĩ, Maitũ nĩ Ma Itũ hĩndĩ ciothe!

Thaaai!