Icokia rĩa Mũingĩ (Referendum) Kenya

Mĩtĩ ya Icokia rĩa Mũingĩ (Referendum) ĩgaikio kiumia gĩkĩ twerekeire, mũthenya wa Mwambĩrĩrio, mweri 21 wa Kanyua Hũngũ, 2005.

Ateti amwe nĩ makoretwo makĩhenania atĩ thirikari ya Kenya nĩ ĩrenda kũrũgamia ũikia ũcio wa mĩtĩ, nĩ ũndũ wa gwĩtigira kũhotwo nĩ arĩa mararegana na Kĩambi Watho kĩrĩa kĩerũ, na nĩ o Tũcungwa.

Ateti aya nĩ moigĩte o rĩngĩ atĩ thirikari ĩrenda kũhũthĩra cira wa gĩkundi kĩa Yellow Movement ũrĩa ũrarĩ igotiinĩ inene kũrũgamia ũikia wa mĩtĩ. Etĩkania na Kĩambi Kĩerũ, na nĩ o Tũrigũ, hamwe na thirikari nĩ mareganĩte na maheni macio na gũtirĩ ũira muoneku ũngĩnyita mateta macio ma Aregani na Kĩambi Watho mbaru. Mũtongoria wa Bũrũri, Mũgathe Mwai Kĩbakĩ nĩ onanĩtie kwenda ũikia ũyũ wa mĩtĩ ũthiĩ na mbere mweri 21 wa Kanyua Hũngũ, o ta ũrĩa kũbangĩtwo.

Cira ũcio mũgwete haha rũgongo nĩ ũratuirwo ira mweri 15 wa Kanyua Hũngũ, 2005 na gĩkundi kĩu kĩa Yellow Movement kĩrahotwo, na ũikia mĩtĩ ya Icokia rĩa Mũingĩ ũratuĩka ũthiĩ na mbere hatarĩ kĩgirĩrĩria.

Magĩtua cira ũcio, manjanji matatũ, Joseph Nyamu, Roselyne Wendoh, na Mathew Anyara Emukule, nĩ maroigire atĩ:

1. Mũtongoria wa bũrũri e na ũhoti wa kwanĩrĩra atĩ Kĩambi Watho kĩrĩa kĩracokeirio mũingĩ wĩtĩkĩre kana ũrege nĩ gĩatuĩka watho mwerũ
2. Wandĩki wa Kĩambi Watho no wambĩrĩrio nĩ Nyũmba ya Gũtua Mawatho hamwe na Thirikari, no mũingĩ nĩ guo wĩ na itua rĩa mũico
3. Arũgamĩrĩri a ithurano bũrũriinĩ, ECK, nĩ ahotithie nĩ watho kũrũgamĩrĩra ũikia wa mĩtĩ ya Icokia rĩa Mũingĩ
4. CKRC hamwe na rũhonge rwa watho rwa thirikari nĩ o matũmĩte gũkorwo na mĩhĩngĩca ĩgiĩ ũikia wa mĩtĩ ya Icokia rĩa Mũingĩ
5. Mandĩko ma Bomas ma Kĩambi Watho kĩrĩa kĩerũ marĩ merirĩria no matiatuĩkĩte watho

O rĩngĩ nĩ tũkũria andũ othe a Kenya, methomere Kĩambi Watho kĩrĩa kĩerũ na maikie mĩtĩ yao kũringana na ũrĩa o ene mekuona kwagĩrĩire, no ti kũrũmĩrĩra ũrĩa ateti ao marenda maikie mĩtĩ. Mũtĩ nĩ waku we mwene, thura mwena ũrĩa ũkwĩyendera.

Thaaai!