Ndaũri Ndaarĩria ya Gĩgĩkũyũ Rũrendainĩ rwa Wikipedia

Ndĩ na gĩkeno ngĩmũmenyithia atĩ rũthiomi rwitũ rwa Gĩgĩkũyũ rũtitigĩtwo na thutha. He na ithangũ rĩa “Meta” rĩa Wikipedia rĩrataũrwo na thiomi nyingĩ, na hamwe na mĩtaũro ya rĩo, nĩ rĩgathiĩ Tunis mũcamanioinĩ wa “UN's World Summit on the Information Society (WSIS)” gatagatĩinĩ ka mweri ũyũ.

Ithangũ rĩu rĩa Wikipedia nĩ ndĩrarĩtaũrire na Gĩgĩkũyũ na no ũrĩone rũrendaĩnĩ rwa Wikipedia ũngĩhihinya Ndaũri ndaarĩria: Mũtaũro wa Gĩgĩkũyũ.

Nĩ njĩrĩgĩte kwandĩka ũhoro wa Wikipedia ya Gĩthwaĩri haha mburogoinĩ ĩno, na ngiuga nĩ ndonaga arĩ wega twĩrutanĩrie twambĩrĩrie Wikipedia ya rũthiomi rwitũ rwa Gĩgĩkũyũ rũrendainĩ.

O rĩngĩ nĩ ngũria andũ ana merutĩre (na niĩ wa gatano na nĩ ndĩrutĩire) twambĩrĩrie Wikipedia ya rũthiomi rwitũ rwa Gĩgĩkũyũ. Ũngĩkorwo nĩ ũrenda kwĩrutĩra no ũnyandĩkĩre marũa-ma-kũbucia ũũmenyithie.

Thaaai!