Tanzania ĩ Mbere Kĩũteti na Ithuranoinĩ

Mũgathe Jakaya Mrisho Kikwete nĩ we ũrahootanire Gĩthurano kĩa Mũtongoria wa bũrũri, Tanzania, na aranyitire makĩria ma icunjĩ 80 kwa igana (80%) cia mĩtĩ ĩrĩa ĩraikirio gĩthuranoinĩ kĩu. Ũhootani wa Kikwete, ũrĩa ũratetagĩrwo nĩ Kĩama kĩrĩa kĩrathana Tanzania, “Chama cha Mapinduzi” ũgũtuonia ũiguano wa kĩama kĩu kĩo kĩene, ũiguano wa kĩama kĩu na mũingĩ wa bũrũri wa Tanzania, na ũiguano wa Kikwete na kĩama gĩake hamwe na mũingĩ wa Tanzania.

O ta ũrĩa Mũtongoria wa mbere wa Tanzania, Mũgathe Mwarimũ Julius Kabarage Nyerere (Gĩturwainĩ: 1961-1985), aatongoririe gĩthurano na agĩũkĩrĩria njũng’wa nĩ guo Ali Hassan Mwinyi, ũrĩa wathurirwo nĩ mũingĩ, aikarĩre gĩturwa kĩa ũtongoria wa bũrũri gũtarĩ gacagaca, no guo nake Mũgathe Mwinyi (Gĩturwainĩ: 1985-1995) aatigĩire Benjamin William Mkapa, na rĩu nake Mũgathe Mkapa (Gĩturwainĩ: 1995-2005) no guo aratigĩire Kikwete gĩturwa kĩu.

Ũguo Mũgathe Kikwete nĩ we mũtongoria wa kana Tanzania kuma hĩndĩ ya wĩyathi, na ũtongoria wa Tanzania ũkoretwo wĩ rungu rwa “Chama Cha Mapinduzi”, na ũthiĩte ũkĩnenganagĩrĩrio na thayũ thutha wa ithurano. Ũguo nĩ kuga Tanzania nĩ ĩkoretwo na ndemokirathĩ ithuranoinĩ icio na nĩ ĩgimarĩte ũtetiinĩ na ĩgatuĩka kĩonereria kĩega gĩa ithurano kũrĩ mabũrũri ma Abirika na ma thĩ yothe. Hongera Tanzania!

Tũkĩgerekania ũteti wa Tanzania na wa Kenya, wa Tanzania wĩ mbere. Ta wĩcirie korwo mũingĩ wa Kenya nĩ ũranyitanĩte guo mwene na ũkanyitanĩra na thirikari hĩndĩ ya ũikia wa mĩtĩ ya Icokia rĩa Mũingĩ wa Gwĩtĩkĩra kana Kũrega Kĩambi Watho Kĩerũ. Korwo ateti a NARC nĩ maraiguanĩte ta ũrĩa ateti a Chama Cha Mapinduzi, Tanazania, maraiguanĩte, gũtingĩrarĩ mũkararanio ta ũrĩa ũraarĩ kuo hĩndĩ ĩyo ya ũikia wa mĩtĩ ya Icokia rĩa Mũingĩ Kenya.

Na korwo kũraarĩ na ũiguano na ũnyitanĩri gatagatĩ ga Tũcungwa na Tũrigũ, Kĩambi Watho Kĩerũ kĩngĩretĩkĩrirwo nĩ mũingĩ wa Kenya na icunjĩ itanyihĩire 80% cia mĩtĩ ĩrĩa ĩraikirio.

Hihi ateti a Kenya nĩ maraikia maitho mwena wa mũhuro?

Thaaai!