Thursday, January 26, 2006

Mwandĩkĩre Mwega wa Gĩgĩkũyũ

Nĩ twĩrĩga kwandĩka kĩhũngĩroinĩ gĩkĩ ũrĩa tũkũbia twa ndemwa cia Gĩgĩkũyũ (ĩ, ũ) twĩkĩragwo na kombiuta. Ũngĩhihinya haha no wĩririkanie ũrĩa twataarĩirie. Ũrĩa tũtaatarĩirie nĩ ũrĩa tũkũbia tũu twĩkĩragwo rũrendainĩ, ta kĩhũngĩroinĩ gĩkĩ kwa mũhiano, nĩ guo tũthomeke na ndera nendainĩ cia kombiuta.

Andĩki aingĩ a Gĩgĩkũyũ matihotaga gwĩkĩra tũkũbia tũtũ wega na rĩmwe na rĩmwe wahota kuona tũkũbia tũhana v nyinamanu (^) mandĩkoinĩ mao, handũ ha tũkũbia tũrĩa twagĩrĩire tũhana ta ũũ (~). Ũmũthĩ tũgũtaarĩria ũrĩa tũkũbia tũu twagĩrĩire twĩkĩragwo nĩ guo tũthomeke wega.

Warĩkia kwandĩka ĩ, na ũ, wega na kombiuta yaku, no ũhũthĩre ndemwa icio kwandĩka mandĩko maku ma kĩhũngĩro kana o mangĩ ma gwĩkĩra rũrendainĩ ũkĩhũthĩra ithangũ rĩa kiugo. Ti ndera nendainĩ ciothe ihotaga gũthoma ndemwa icio, no ciothe nĩ ithomaga Unicode. Kwa ũguo nĩ wega kũgarũra ndemwa ĩ, na ũ, ciothe ũciandĩke na Unicode nĩ guo ithomeke rũrendainĩ. Rũmĩrĩra makinya maya ma kũgarũra ndemwa icio ituĩke Unicode.

1. Unicode ya ndemwa Ĩ nĩ (& # 296;) na ya ndemwa ĩ nĩ (& # 297;) (ndũgatige mwanya gatagatĩ ka ndemwa ici ciandĩke irũmanĩrĩire – niĩ nĩ ndigĩte mwanya nĩ guo ũhote kuona Unicode ici tondũ ingĩaga gũtiga ũkuona Ĩ, na ĩ, kana Ũ na ũ)

2. Na yo Unicode ya ndemwa Ũ nĩ (& # 360;) na ya ũ nĩ (& # 361;) (ririkana ndũgatige mwanya gatagatĩ ka ndemwa ici cia Unicode)

3. Mandĩkoinĩ maku nyita ndemwa ĩ na koroti kinya ĩire ũcoke ũhihinye “edit” na “find” kinya gatirica ka “find and replace” kahingũke ke na ndemwa ĩyo ũkũnyitĩte na koroti (ndemwa ĩyo ĩngĩkorwo ĩtarĩ gatiricainĩ kau no ũmĩkĩre na njĩra ya gũtinia na kũmandĩrĩria)

4. O hau gatiricainĩ kau hihinya “replace”

5. Rĩu nyita Unicode yaku ya ndemwa ĩ na koroti kinya ĩire ũcoke ũmĩtinie na ũmĩkĩre gatiricainĩ ka “replace with”

6. Gatiricainĩ kau mwena wa mũhuro nĩ ũkuona “replace”, na “replace all”. Hũthĩra “replace” kũgarũrũa ndemwa kwa ndemwa, kana “replace all” kũgarũrũa ndemwa ciothe o rĩmwe ituĩke Unicode

7. Cokera kuma ikinya rĩa gatatũ (3) kinya rĩa gatandatũ (6) haha rũgongo, no rĩu ũthure ndemwa ũ na ũmĩgarũre na Unicode ya yo.

Ũngĩhũthĩra “replace all” ndemwa ciothe kinya iria nene (Ĩ na Ũ) cigwĩkĩrwo Unicode ya ndemwa nini, no ũngĩhũthĩra “replace”, “find next”, na "replace" ũkũgarũra kiugo gwa kiugo, na wakinyĩrĩra ndemwa nene no ũgarũre Unicode ya yo hĩndĩ ĩyo. Hau nĩ we ũkũmenya ũrĩa ũhũthũ, na no ũhũthĩre wara waku.

Ngwĩhoka nĩ ũgũteithio nĩ ũtaarĩria ũyũ.

Thaaai!

3 Comments:

Anonymous Ngure wa Wanjiku said...

Ngatho nyingi muthuri uyu ugwitwo Gatua.

I haven't finished reading your blog about how to write Kikuyu properly ... so forgive me ... it's still easier for me to type in English. ... for now.

I have heard alot of talk about promoting our culture and of making the internet accessible to potentially anyone in Africa... by breaking down language barriers.

You have the distiction of having done something about it. For that, I am pledging to do my best to spread the word about your blogsite ...

Please keep up the good work !

February 25, 2006 3:45 PM  
Blogger Gatua wa Mbũgwa said...

Nĩ wega mũno Bw. Ngure nĩ gũceera na gũtũhe mawoni maku. Ceeraga kaingĩ.

Thaaai!

March 02, 2006 11:49 PM  
Anonymous ndesanjo said...

Namuunga mkono Ngure wa Wanjiku.
Nitakutumia mahojiano uyapitie mara ya mwisho.
uhuru!

March 28, 2006 1:07 PM  

Post a Comment

<< Home