Kĩbakĩ nĩ aheo mĩaka ĩngĩ ĩtano ya maendeleo

Ũmũthĩ nĩ guo uma mũthenya wa kũguũria kĩama kĩa Party of National Unity (PNU), kĩrĩa Mũtongoria Mwai Kĩbakĩ egwetha mĩtĩ na kĩo ya kũmũcokia wathaniinĩ wa bũrũri witũ wa Kenya mĩaka ĩngĩ ĩtano ya mũthia. Mũtongoria Kĩbakĩ nĩ oigaga kaingĩ atĩ ekwenda mĩaka ĩngĩ ĩtano tu wathaniinĩ, o ta ũrĩa Kĩambi Watho gĩa Kenya kiugĩte. Ũũ nĩ kuga nĩ etĩkanĩtie na Kĩambi Watho kĩa bũrũri, na nĩ wega ũguo.



Akĩarĩria mũingĩ ũkĩrĩte 80,000 kĩharoinĩ kĩa mathako kĩa Nyayo, Mũtongoria Kĩbakĩ nĩ oririe mũingĩ ũmũhe mweke wa gwathana na kũrehe “maendeleo” mĩaka ĩngĩ ĩtano ya mũthia, na oiga atĩ ũteti wa wethi mĩtĩ ũgũkorwo wĩgiĩ maũndũ ma ũthii wa na mbere marĩa moneku na mangĩoneka matukũ twerekeire ma kũrehe ũtonga kũrĩ mũingĩ.

Mũtongoria Kĩbakĩ nĩ athire na mbere oiga atĩ ũteti wa kanua gatheri na wa kwĩringaringa gĩthũri ndũngĩteithia bũrũri, na kũngĩkorwo na mũndũ ũkuga atĩ thirikari yake ndĩrĩ wĩra ĩrutĩte orio kwao na eranĩra kwao erwo kũu thirikari ĩkĩte ũũ na ũũ tondũ gũtirĩ gaturi o na karĩkũ thirikari ĩtarutĩte wĩra wa gwaka bũrũri. Ningĩ nĩ oigire andũ othe magĩe na ũteti wa thayũ.

Maũndũ mamwe ma bata marĩa thirikari ya Mũtongoria Kĩbakĩ ĩkĩte nĩ:
1. Gĩthomo kĩa burĩ gĩa thukuru cia ũgĩ.
2. Ũkũria wa GDP kuma 1% ũguo kinya 6.1%.
3. Kũrehithia ndawa mathibitarĩinĩ na kũgũithia kana kweheria marĩhi ma ũrigiti.
4. Kũgeria kũrehe thayũ bũrũriinĩ.
5. Kũhũũrana na ũici wa igĩna cia mũingĩ, o na gũtuĩka wĩra ũyũ no ũrathiĩ na mbere na ndũrĩ ũraithĩrana.
6. Gũthondekithia mabarabara, na mangĩ maingĩ.

Mũtongoria Kĩbakĩ nĩ athire na mbere oiga atĩ kuma mwaka twerekeire gĩthomo kĩa mathukuru ma ngathĩ ya gatagatĩinĩ kuma Form One kinya Form Four gĩgũkorwo gĩ kĩa burĩ, tiga no marĩhi ma ũraro na mangĩ ta macio.

Tũkĩaria ma, maũndũ marĩa mekĩtwo nĩ thirikari ya Mũtongoria Kĩbakĩ nĩ matwarĩte bũrũri witũ na mbere na ũkaingĩra makinyainĩ ma mabũrũri marĩa merekeire kwĩyathĩra ũtonga. Ũndũ wa bata mũno makinyainĩ maya nĩ gũkorwo mbeca cia igoti iria thirikari yũnganagia kwĩ mũingĩ nĩ cio irũgamagĩrĩra icunjĩ 93% cia mahũthĩro ma thirikari, na mĩaka twerekeire hihi irĩrũgamagĩrĩra mahũthĩro ma thirikari mothe.

Ũyũ nĩ ũthii wa na mbere, na nĩ kĩo kĩhũngĩro gĩkĩ kĩranyita mbaru na gwĩtĩkania na mĩario ya Mũtrongoria njamba, Mwai Kĩbakĩ. Gũtirĩ kĩndũ kĩa bata ta kwĩyathĩra ũtonga wa bũrũri wa mũndũ, na wĩra ũyũ mwega nĩ ũrathiĩ na mbere o ta ũrĩa kĩama kĩa PNU kĩroiga, “Kibakĩ Tena, na kazi iendelee”.

Ũteti wa tũnua tũtheri
Ũteti wa ciama cia mũng’ethanĩro iria iraregana na wathani wa mũtongoria Mwai Kĩbakĩ nĩ ikoretwo ikiaria maũndũ maingĩ ma gũcambia thirikari o na ĩrutĩte wĩra mwega. ũũ ti kuga atĩ thirikari ndĩrĩ maũndũ moru ĩkĩte mĩakainĩ ĩyo ĩtano ĩkoretwo wathaniinĩ, aca. Gũtiri thirikari itarĩ wathe, na thirikari ya Mũtongoria Kĩbakĩ o ta guo. Ĩndĩ, wĩra wa kĩrĩndĩ na wa gwaka bũrũri ti wĩra mũhũthũ, na gwĩ kũgwa na gũtirũka. Maũru maingĩ ma thirikari no metwo ma gũtirũka.

Andũ aingĩ a bũrũri witũ nĩ monete na maitho mao thirikari ĩkĩgeria kũmanyihĩria mathĩna, kũmahotithia kwĩyambatĩria ngathĩ cia macumo kũringana na wĩhoti wao, na kũmaramĩria mĩhaka ya wĩyathi na ya kwĩyaria mũthenya barigici mategũikia maitho mwena na mwena marore kana he icerũ imoimĩte thutha. Maũndũ maya nĩ ma bata mũno monekete bũrũriinĩ witũ kahindainĩ ka miaka ĩtano tu mĩhĩtũku.

Mbegũ cia ũthii wa na mbere na wĩyathi nĩ hande nĩ mũingĩ hamwe na thirikari ya Kenya ya matukũ tũrĩ. Na o ta ũrĩa Mũtongoria Kĩbakĩ oigĩte kaingĩ, arĩa marenda kuona wĩra mwega ũrĩa thirikari ĩrutĩte nĩ marona, no arĩa matarenda kuona ciĩko njega cia thirikari o na mangĩhũrĩrwo mbugi matingĩmona.

Kĩhũngĩro gĩkĩ nĩ gĩkũria mũingĩ wothe wa bũrũri witũ ũrĩa wonete wega wa thirikari ndũkarekererie maheni mahoote ũũma. Njĩra ĩrĩa hũthũ mũno ya gwĩka ũguo, kana ya gũtũũria ma, nĩ ya gũikia mĩtĩ. We wĩ na mũtĩ wĩnyitĩire nĩ ũkũrio ũthiĩ na mbere gwĩka wega o ta ũguo wekire rĩrĩa woyire mũtĩ ũcio, na gũikia mũtĩ waku nĩ guo wĩthurĩre rũciũ rwaku. Na ũngĩkorwo wĩ na mũraata kana araata me na mĩtĩ, geria mũno kũmera magerie o ta ũria kwahoteka gũikia mũti wao gĩthurano gĩakinya. Mũtĩ wĩ mũhuko ndũrĩ bata, ũgĩaga bata waikio.

Ningĩ, nĩ tũkũmũria mũikare mũtegete matũ wega mũigwe maũndũ marĩa mothe mũkwĩrwo nĩ ateti gũgĩgakinya hĩndĩ ya gĩthurano. Maũndũ marĩa mũkwĩrwo ti mothe ma ma, na nĩ kĩo arĩ wega mũno o mũndũ o wothe amathuthurie amenye marĩa ma ma na marĩa ma maheni ma gwetha mĩtĩ. Thuranai na meciria manyu!

Thaaaai!