Kũnyitwo kwa Dedan Kĩmathi Kwarĩrĩrio Rũrendainĩ

Kuma ndekĩra mũkwa haha wa kuonania kũnyitwo kwa Dedan Kĩmathi nĩ thirikari ya Kenya ya gĩkoronĩ, he mwandĩki ũmwe wa ngathĩti ya rũrendainĩ wandĩkire ũhoro ũcio. Nĩ gũkoretwo na andũ aingĩ mandĩkĩte mawoni mao ngathĩtiinĩ ĩyo megiĩ Kĩmathi na Mau Mau, na no ũhihinye haha wĩthomere.

Nĩ ngũcokeria mwandĩki ũcio wa ngathĩti ya Kenyaimagine ngatho nĩ kwandĩka ũhoro wa Kĩmathi. Kwerirwo kanya gatune nĩ mwamũkanĩro!

Kwaria ma nĩ andũ aingĩ mũno a Kenya matoĩ ũcamba wa Kĩmathi kana wa njamba ingĩ hamwe na mbũtũ cia Mau Mau, na gĩtũmi kĩmwe nĩ ũndũ wa thirikari iria ikoretwo ho thutha wa “wĩyathi” kwaga kũmenyithia mũingĩ ũtene wa bũrũri witũ na kwaga kũhe njamba cia bũrũri gĩtiyo.

Ĩndĩ, ũhoro wa Kĩmathi na Mau Mau ndũgakua kinya tene! Thirikari ya Mwai Kĩbakĩ nĩ ĩgeretie mũno ũhoroinĩ ũyũ tondũ nĩ ĩrakithia mũmbo wa kĩririkania gĩa Kĩmathi, ũrĩa ũgũkorwo harĩa barabara ya Kĩmathi ĩnyitanĩire na barabara ya Mana Ngĩna.

Gĩĩko gĩkĩ nĩ kĩa bata mũno ũteneinĩ wa bũrũri witũ na wa njamba cia wĩyathi witũ. O na gũtuĩka ma njerere nĩ ma nyimane, kĩrĩa kĩ bata mũno ng’endoinĩ ti gũcererwo, nĩ kana mũndũ nĩ ekũrĩkia rũgendo. Mũmbo wa Kĩmathi wehanda magomano ma bara ya Kĩmathi na ya Mama Ngĩna, Kĩmathi agwete mũcinga wa kũrangĩra ithaka cia nyakairũ hamwe na wĩyathi, bũrũri wa Kenya nĩ ũgũkorwo wambĩrĩria rũgendo rwa kũhe njamba citũ gĩtĩyo, o na gũtuĩka nĩ thutha wa mĩaka 50.

Gũcererwo ti gũtĩra!

Thaaaai!