Mũtaũro wa Mũrogi wa Kagogo Kũhootana “2006 California Book Awards”

Mũtaũro wa ibuku rĩerũ rĩa Ngũgĩ wa Thiong’o, Wizard of the Crow, nĩ ũrehotanĩire Mindira ya Thahabu ya ibuku rĩa rũgano macindanoinĩ ma “California Book Awards” ma 76 ma o mwaka. Wizard of the Crow nĩ mũtaũro wa ibukũ rĩa Prof. Ngũgĩ wa Thiong’o rĩrĩa andĩkire na Gĩgĩkũyũ rĩtagwo, Mũrogi wa Kagogo. Ibuku rĩĩrĩ nĩ rĩo inene mũno rĩrĩ rĩandĩkwo na rĩũthiomi rwa Kĩabirika tiga Kĩrĩkanĩro.

Atua Cira wa ũhotani ũcio nĩ maroigire atĩ Ngũgĩ wa Thiong’o, ũrĩa ũkoretwo ithamĩrioinĩ USA makĩrĩa ma mĩaka 20, nĩ atuĩkĩte ũmwe wa andĩki arĩa me ngumo mũno a kuma Abirika matukũ tũrĩ.

Atua Cira acio nĩ maracokire maroiga atĩ ibuku rĩu rĩa Ngũgĩ rĩa gwĩtungĩra nĩ rĩmwe rĩa mabuku marĩa mega mũno ma mwaka wa 2006. Maroigire ibuku rĩu rĩ na ũriku na wariĩ mũnene mĩerekanĩroinĩ ya mathĩna ma bũrũri ũregucĩrĩria mũkanda ngingo. Maũndũ marĩa me ibukuinĩ rĩĩrĩ mekĩirwo bũrũriinĩ wa Aburĩria.

Atua Cira marathire na mbere maroiga atĩ Wizard of the Crow nĩ ibuku rĩkuanĩirie magegania ma maũndũ maroneka ta mangĩkĩka na ta matangĩkĩka, na muogothano wa ng’ano iria irĩ ibukuinĩ rĩĩrĩ nĩ guo ũratuma mũthomi aremwo nĩ kũrĩiga thĩ agathiĩ o akĩguũragia ithangũ gwa ithangũ.

Ibuku rĩa Gĩgĩkũyũ rĩa Mũrogi wa Kagogo rĩrutithĩtio rĩ mbuku ithatũ ta ũũ:
1. Mbuku ya Mbere na ya Kerĩ (Ngoma cia Ũnene na Ngoma cia Mĩhari)
2. Mbuku ya Gatatũ (Ngoma cia Aka)
3. Mbuku ya Kana, Gatano na Gatandatũ (Ngoma cia Arũme, Ngoma cia Aregi, na Ngoma cia Nderu)

Mũtaũro wa Kĩngeretha ũrutithĩtio wĩ ibuku rĩmwe, o rĩrĩa rĩa Gĩgĩkũyũ rĩrutithĩtio rĩ mabuku matatũ matanyitanĩte. Mwĩhoko nĩ atĩ iruta rĩa Kerĩ rĩa Gĩgĩkũyũ mabuku macio matatũ nĩ makanyitithanio marutithio me ibuku rĩmwe.

Mũthamaki Ndaiguagwo Kwao
O na gũtuĩka mũtaũro wa Kĩngeretha nĩ wĩhotanĩire maita maingĩ hamwe na kũgathĩrĩrio magathĩtiinĩ ma thĩ ng’ima, rĩu rĩa Gĩgĩkũyũ rĩtirĩ rĩragathĩrĩrio wega. He bata ithuothe hamwe na bũrũri witũ tũgakũngũagĩra arathi aitũ a mũciĩ, ta Prof. Ngũgĩ wa Thiong’o, rĩrĩa mandĩka mabuku mega kana marutĩra bũrũri wao wĩra wa bata, ta wa gũkũria rũthiomi rũmwe rwa Kenya kana rwa Abirika, kwa mũhiano.

Prof. Ngũgĩ wa Thiong’o nĩ we Mũtongoria wa International Center for Writing and Translation, Yunibathĩtĩ Ya California, Irvine.

Kĩhũngĩro gĩkĩ kĩa Maitũ nĩ Ma Itũ nĩ kĩrakũngũĩra ibuku rĩĩrĩ, na nĩ gĩatũma KŨNGŨ cĩa kĩo kũrĩ mwandĩki njorua, Prof. Ngũgĩ wa Thiong’o. Arorĩma gũkuumia, arogeraga njĩra gatagatĩ, na arorathimĩrwo matukũ nĩ guo akaarĩaga cia tũcũkũrũ na tũcũkũrũkũ.

Thaaai!


Mabuku mothe marĩa marahootanire “2006 California Book Awards” nĩ:

Fiction
Wizard of the Crow by Ngugi Wa Thiong’o (Pantheon) [Thahabu]
Talk, Talk by T.C. Boyle (Viking) [Betha]

First Fiction
Artificial Light by James Greer (Akashic Books) [Betha]

Nonfiction
The Omnivore’s Dilemma by Michael Pollan (Penguin) [Thahabu]
Enrique’s Journey by Sonia Nazario (Random House) [Betha]

Californiana
The Great Black Way by R.J. Smith (Public Affairs) [Betha]

Poetry
New and Collected Poems 1964-2006 by Ishmael Reed (Carroll & Graff) [Thahabu]

Young Adult
A True and Faithful Narrative by Katherine Sturtevant (Farrar, Straus, Giroux) [Betha]

Juvenile
Landed by Milly Lee (Farrar, Straus, Giroux) [Betha]

Nĩ gũgakorwo na iruga inene rĩa gũkũngũĩra ũhootani wa mabuku maya hamwe na andĩki a mo, mũthenya wa Kerĩ mweri 7 wa Gacicia, 2007, kĩrabuinĩ gĩa “Commonwealth Club" kĩrĩa kĩ 595 Market Street thĩiniĩ wa San Francisco. Ikũngũĩra rĩĩrĩ nĩ rĩhingũrĩirwo mwĩyenderi, na rĩkambĩrĩria thaa Ikũmi na ĩmwe hwaĩinĩ (5:00 p. m.). Iheo na cio ikaheanwo kwambĩrĩria thinacara ya hwaĩinĩ (6:00 p. m.). Marĩhi ma kũingĩra nĩ $15 o tigiti, na mũndũ ũkwenda kũigĩrwo mweke no ahũre thimu ndari ici irũmĩrĩire mbere ya mũthenya wa iruga rĩu: 415/597-6705/6706.

Iheo ta ici ciambĩrĩirie kũheyanwo California mwaka wa 1931.

Thaaai!